طيب لازم نبقى متفقين على حاجة
أهم ثلاث حاجات في حياة أي شَلة خيط " يعني في حياتنا "
😎أولا: مين اللي فك الورقة اللي كانت مسيطرة و مخليانا زي الكتاب ما بيقول
🤔ثانيا: مين اللي شد الخيط و كعبله وعمل الكلكعة الخرافية اللي يا عالم هتتفك و لا لأ
😥ثالثا: الخطوات اللي حصلت بعد الكلكعة، عرفنا نرجع الأمور لقواعدها سالمة ولا نفسنا نرمي الخيط من بابه
🙄 نقول بسم الله و نفتكر سوا مين فك الورقة اللي كلنا كنا بنتدارى فيها ، حد فكها ولا حاجة ، أثرت لدرجة اننا فاكرينها ولا تاهت وسط كلكعات كتييييييييير، طب لو فاكرينها ، فاكرينها ازاي ؟ واحنا متضايقين ولا واحنا ندمانين ولا واحنا بنلوم حد وشايلين منه مع اننا بقينا حاجة وعشرين سنة "سامحني يا رب"
🙈 او حاجة و ثلاثين ويمكن حاجة وأربعينعشان ما تفتكروش اني باقول فوازير او طلاسم ... أنا شخصيا ورقتي اتفكت يوم ما قرر والدي الله يرحمه نسافر ، نشد الرحال لقبول اعارة في دولة عربية زي ما كل المدرسين كان بيحصل معاهم بشكل دوري تبعا للتربية و التعليم في فترة ما
💔.
ساعتها بس فهمت ان الدنيا اكبر من بيتنا واسرتي وعيلتي الجميلة اللي كانوا
فعليا ورقتي اللي محافظة على رونقي واللي كنت حرفيا دلوعتهم وكان بيت
جدتي مملكتي وخيلاني و خالاتي و حتى ابن خالتي الكبير كلهم بيلبوا طلباتي و
يفرحوني و بس 
💖.اكتشفت ان فيه ناس ما يهمهمش اكون فرحانة أو حتى زعلانة مش فارقة. ولو حد زعلني مش هيدافعوا عني زي ما كان بيحصل ولو طلبت حاجة مش أساسي تتحقق، وكل أوقات اللعب والضحك في بيت جدتي تم استبدالها بالقعدة في البيت مع ماما و اختي مع التليفزيون و الاتاري "البلاي ستيشن بس الاصدار الاوريجينال "
😊 ومدرستي اللي بحبها تم استبدالها بمدرسة بالاقي صعوبة في فهم لهجة زملائي بنفس صعوبة فهم لغة جديدة.دلوقتي لما بافتكر الفترة دي مش زعلانة و مش فرحانة ومش بالوم حد لأني شايفة انها كانت مرحلة ضرورية في حياة والدي الله يرحمه اللي عمره ما استخسر اي طريقة او تكلفة عشان يفرحنا في الأيام دي لأنه كان متفهم البسترة اللي حصلت لنا. وأثرها السلبية اتمسحت بالفعل كليا من جوايا وسابت بس شوية دروس صغننة هاحطها في اعتباري لو فكرت في يوم أسافر بأولادي لبلد تانية.
يا ترى كل حد فيكم فاكر بالتفصيل امتى و ازاي وليه ومن مين اتفكت ورقته
وابتدى خيط حياته يتسرسب عشان يتكلكع او عشان ينسج عمل فني جميل متناسق
ويقدر يصارح نفسه بالتفاصيل دي؟
البوست ع الفيس
https://www.facebook.com/om.abdelrahman.7355/posts/2322833784607537
0 comments: