شلة خيط 1

مين من جيلنا ما لبسش بلوفر تريكو هاند ميد من ايدين ست الحبايب
الصوف وهو جاي بشوكه بيبقى مهندم وملموم بورقة توصف نوعه و فتلته و مصنعه وكل تفاصيله ، أول ما تتفك الورقة دي من الشَلة يااااااااااااااااااه ع اللي بيحصل بيبقى مكعبل و مكلكع و متاهة و من رابع المستحيلات ان يتعمل بيه سطرين ورا بعض على ابرة التريكو. لكن لما ست الحبايب تفك الورقة بحرفنة وتمسك طرفه بمنتهى التمكن و تبتدي تلفه على شكل بكرة منتظمة مستحيل يتلعبك و السطور تطلع ورا بعض بمنتهى السلاسة و نفضل نراقب بمنتهى الترقب الصدر ، الظهر ، الكم الاول ، الكم الثاني و هييييييييييييه البلوفر بيتقفل و هنلبسه اول لبسة 😁
كل واحد فينا ما هو إلا شَلة صوف ..... أيونننن شَلة مهندمة مظبطة ماشية تبع السيستم و الورقة اللي ماسكاها فيها كل التفاصيل والتعليمات بوضوح و ايجاز تخللي اي حد يشوفنا يشعر بمنتهى الثقة ان التعامل معانا سلس و استعمالنا في عمل بلوفر حياته اسهل من السكينة في الحلاوة.
الفكرة ان مش كل الناس بحرفنة ست الكل في انه يمسك طرف الخيط ويلف البكرة و ينسج السطور ورا بعض من غير لعبكة و كلكعة ، فيه ناس للأسف بتبقى ولا اجدعها قطة لما تسلمها الخيط تكعبله و تكلكعه و تخليك مش عارف أول الشَلة من آخرها وممكن تقطع الخيط وساعات الخيط من كتر كلكعته بتبقى عايز ترميه اصلا و تجيب خيط جديد لكن مستخسره ، أصله غالي و طخيت مشوار محترم على ما رحت جبته.
طب هو ينفع اصلا نرمي الصوف ونشتري واحد غيره؟؟ أكيد لأ محدش بيغير نفسه ماهو مالهاش قطع غيار 😊
اشطة ، يبقى التصرف ايه؟
هاقوللكم بكرة ولا بعده 😉

البوست ع الفيس 

https://www.facebook.com/om.abdelrahman.7355/posts/2322107188013530

• Tweet
• شارك
• شارك
• شارك
• شارك