شلة خيط 3

طيب الأمر لله ، قدر الله و ما شاء فعل والورقة اتفكت و اللي حصل حصل
نهاية الدنيا؟ لا بالعكس ، دي بدايتها ... بداية الحدوتة أو الحواديت. صحيح الكلام ان فكة الورقة معناها كلكعة و لعبكة ، بس برضه فيها نسيج بيكبر سطر ورا سطر مع كل يوم بيعدي واحنا في مرحلة الادراك.
أصل اللي قبلها ما كانتش ادراك كانت منطقة سلام وأمان خالية من أي منغصات أو comfort zone 😎وده مصطلح متعارف عليه لحد كبير.
أروع حاجة اننا نلاقي اللي ياخد بايدينا و يوسع مداركنا و نحس اننا بنتفتح ع الدنيا زي البرعم اللي بيتحول لوردة رائعة 😍. اللي بيعمل كدة مش بيبقى بيفك كلكعة ولعبكة بيبقى لسة بيسحب الخيط واحدة واحدة واحنا في حالة من الترقب و التشويق و الاثارة والخوف والتوتر تناقضات كتير بس مش وحشة زي اي فيلم اكشن مترقبين أحداثه.
بالنسبة لي ابتديت افهم يعني ايه ولد وبنت، انا بحب ايه و ايه هواياتي، انا اقدر اعمل ايه وشاطرة فيه حتى لو مش بحبه، انا بازعل من ايه وبافرح من ايه، الدنيا فيها دول وقارات تانية غير بيتنا ومدينتنا، البيئات المختلفة بتخللي الناس مختلفة، فيه حاجة اسمها تربية والبيت اللي خارج منه كل واحد بيؤثر في شخصيته فكلنا مش شبه بعض حتى لو كلنا بنات عمرنا تسع او عشر سنين.
لكن كل ده لم يتعدى الادراك ماكنش فيه خطوات باخدها عشان اتعامل مع الكم الهائل ده من الحاجات اللي أدركتها في وقت قصير😥
يعني انا عرفت يعني ايه بنت بس مفهمتش ازاي اتعامل مع الانوثة دي، عرفت بحب ايه واقدر اعمله لكن ما مارستوش ، بازعل من ايه لكن ما باقولش اني زعلت ولا باقول للي زعلني ما تعملش كدة تاني، الدنيا فيها بلاد و بيئات كتير لكن مش كلها سهل أتعود عليها، اللي من سني و من جنسي لكن ليهم شكل وطبع و شخصية مختلفين مش عارفة اتعامل معاهم بشكل ما يطمسش شخصيتي انا.🤔
وهنا بدأت الكلكعة 😣

البوست ع الفيس

https://www.facebook.com/om.abdelrahman.7355/posts/2325567411000841

• Tweet
• شارك
• شارك
• شارك
• شارك