ممكن نتعرف

هلا وسهلا بحضرتك ... ممكن نتعرف؟
أهلا بيك أنا الباشمهندس فلان ، أنا مدام فلانة ، أنا بنت فلان الفلاني ، أنا أخت فلان ، أنا أم فلان

طيب هو لو حضرتك طلعت معاش أو اترفدت ولو حضرتك اتطلقتي ولو حضرتك والدك أو أخوكي أو ابنك توفوا أو قاطعوكي ممكن ساعتها تعرفوا نفسكم بمين؟🤔

لحظة من الصمت وبعدها تفكير أو ثورة غضب أو استهزاء بالسؤال و تجاهل للرد

طيب خلينا مع اللي بيفكروا عشان دول اللي هيفهموني

كل التعريفات اللي فاتت دي ماكانتش أنت ، كانت وظيفتك أو حالتك الاجتماعية أو دورك كأب أو أم أو زوجة أو أخت

أنا كدة معرفتش انت مين؟ طيب مش مهم أنا أعرف. انت عارف؟ ده الأهم

فيه ناس لما بتفقد وظيفتها بسبب المعاش أو بسبب عذر صحي أو بسبب تخفيض العمالة زي ما بقى بيحصل مع ناس كتير بتتوه ومش بتلاقي نفسها😵

فيه ناس كل اللي تعرفه دورها الأسري و الاجتماعي اللي بتؤديه بكفاءة سواء زوج أو زوجة أو أب أو أم أو بنت أو ابن أو حتى أخ أو أخت ، بيدوروا في فلك آخرين رابطين حياتهم بيهم ولو اختفوا من الصورة لأي سبب من الأسباب حياتهم بتقف ، بتتشل ، بيفقدوا هويتهم ومجرد قدرتهم على الاستمرار على قيد الحياة بتعتبر حرفيا نحت في الصخر.😥

طب لو أنا معرفتش نفسي بوظيفتي أو بدوري أو حالتي الاجتماعية ، يعني ايه أعرف نفسي؟🤨

يعني ببساطة تقول انت مين... أفكارك، قدراتك، طاقتك، ابداعك، أحلامك، امكانياتك، هواياتك

اللي يخلوك لو خسرت وظيفة توجد شغل و مصدر دخل تاني😎

لو فقدت أب أو أم أو زوج أو زوجة أو ابن أو بنت رغم حزنك وافتقادك ليهم تكمل لأنك مؤمن ان دي سنة الحياة مش دي كل الحياة 😣

لو أصابك أي مرض أو نوع من العجز ما تيأسش وتبقى عارف انك لسة كامل ولسة قدراتك وطاقتك موجودة طول ما فيك نفس و هتكمل و تعيش و تنجح بس بشكل مختلف ممكن أصلا لولا الاصابة دي مكنتش تعرفه عن نفسك 💪

ابتسامة استهزاء على جنب شفتك انا شايفاها وفاكرني باتفلسف 😏

طيب يا سيدي الفاضل ورقة وقلم واكتب صفحة عن نفسك، نفسك انت ، من غير وظيفة ولا دور يربطك بآخرين من أي درجة، لو تمكنت من كدة بمنتهى السلاسة اسمح لي أحييك و أبدي لك كل الاحترام و التقدير و يشرفني أتعرف عليك بجد🤗

لكن لو حسيت بالعجز ما تزعلش واعرف ان بس فيه باب مقفول بينك و بين نفسك محتاج تفتحه على مصراعيه وتعرف وراه ايه وساعتها هتدعي لي

البوست ع الفيس

https://www.facebook.com/om.abdelrahman.7355/posts/2352347021656213

البيضة ولا الفرخة

انتي عصبية ... انت اللي مستفز
انتي ما بتسأليش ... انتي اللي قلتي لي مش عايزة اسمع صوتك
انت مهمل في شغلك ... انت اللي ما بيعجبكش العجب
انتي مقصرة معايا ... انتي اللي متحفزة
انتي مش راضية تسامحي ... رصيدك معايا خلص
انتي مش بتهتمي بالبيت والأولاد ... انتو اللي مش بتقدروا
انت مش أد المسئولية ... انت اللي محملني فوق طاقتي
سلسلة لا تنتهي من الاتهامات المتبادلة بين طرفين أيا كانت العلاقة التي تربطهم ... عمل ، زواج، بنوة، أبوة، صداقة، قرابة
سيناريو مكرر حتى وإن اختلفت المرادفات والمواقف والأعمار والثقافات ، ان كنت فيها حكما تجد نفسك في منتهى الحيرة وليس من السهل إطلاقا التحيز لطرف دون الآخر فهذا النوع من المواقف دائما ما ينطوي على رواسب وتاريخ ورد الفعل ليس فقط ردا على الموقف الأخير ولكنها تراكمات تجعلنا نسأل بتلقائية هو البيضة الأول ولا الفرخة🙈

البوست ع الفيس

https://www.facebook.com/om.abdelrahman.7355/posts/2352355721655343

ايه الحل

كبر دماغك
طنش تعش تنتعش
كشكشها ما تعرضهاش
كبر الG و روق الD
يا عم كفى الله المؤمنين شر القتال
التغافل والتجاهل كلمتي السر لسعادة لكل عاقل
ويمكن غيرها من اللي لسة ما وصلنيش من مصطلحات تدعو بمنتهى البساطة لعدم الاهتمام بأمور معينة، أو بكل الأمور مع اختلافها عشان نوصل لراحة البال ونبعد عن الارهاق الذهني والعقلي والعصبي ولنفسي ... خصوصا ان العالم من حولنا أصبح مليئ بسواد حاااااااااااااالك ، سلبيات لا تنتهي، حوادث تنتهك فيها كل معاني الانسانية والقيم بلا استثناء.
كله بقى عاااااااااااااااادي، مفيش تشويق أو اثارة، مهما وصل تفكيرك للسيء هناك دائما الأسوأ اللي بيفوق أي فيلم هندي أو أكشن أو حتى خيال علمي ما بتصدقش أحداثه.
وحتى بيوتنا ودنيانا الصغيرة صارت قاسية جدا كلها جري وجري وجري
جري ورا الرزق، جري عشان الوقت ضيق، جري للوصول لحاجة، جري للهروب من حاجة المهم ان الطاقة لا تكفي كل ده
فنعمل ايه؟ نقول كفاية، مش عايز أفكر تاني، مش عايز أزعل تاني، مش عايز انسانيتي وضميري يوجعوني تاني، مش عايز أخاف تاني. لدرجة ان فيه ناس حرفيا بتقطع علاقتها بالناس اللي بيعملوا كدة أحسن يبهتوا عليها، أحسن يصحوا مشاعر بنسكتها، أو يناقشونا واحنا مستهلكين ذهنيا.
الطريقة دي في التعامل مع مشاكل وأحداث حياتنا مش غلط ومش صح. هي مجرد طريقة من خمس طرق للتعامل مع المشاكل اسمها التجنب أو (Avoiding)
لكن زيها زي أي شيء في الدنيا لو زادت عن حدها بتقلب لضدها، بتوصل الانسان انه معزول، عايش في عالم مالوش علاقة بالعالم، نسمية بقى comfort zone او نسميه لالا لاند، مش مهم ، المهم انه خراب يا دنيا عمار يا دماغي
بالنسبة لي الجرعة المظبوطة لما ده يحصل مع صغائر الأمور، الأرز اتحرق، موعد اتغير، حد نسي يجاملني في فرح أو زعل ... عشان مش كل حبة نعمل منها قبة فتزيد الأمراض النفسجسمانية اللي أصلا موجودة من غير حاجة ومعمول لها ميزانية لوحدها من قولون عصبي وضغط وحموضة وصداع وخلافه

البوست ع الفيس

https://www.facebook.com/om.abdelrahman.7355/posts/2339994456224803 

فقدان

تسألينني صغيرتي عن الفقدان
أي فقدان تقصدين؟
فقدان القيم في زمن يخلو من أبسطها؟ حيث صرنا نلوم من ربونا على أخلاق حميدة وقيم صارت مثار للسخرية؟
أم فقدان الثقة في الآخرين من خيانات وغدر متكررين؟ من أشخاص غير متوقعين ربما كانوا يوما أعز الأصدقاء؟
أم فقدان لوظيفة ومصدر رزق في وقت صارت المادة هي صاحبة الكلمة العليا؟
أم فقدان الثقة بالنفس من مرض يصيبنا ويجعلنا نختلف عن الآخرين أو يصيبنا بعجز عن ممارسات حياتنا قبل المرض؟
أم فقدان النفس؟ وآآآآآه من فقدان النفس وسط زحام الحياة والأحداث والسنين التي نفاجأ بأعدادها بعد أن تمر وليس خلال مرورها؟
أم فقدان الطاقة لتكملة الرحلة وممارسة دور أو ربما أدوار ألقيت على عاتقنا بارادتنا أو رغم ارادتنا وبحكم العمر كما يقولون سنة الحياة؟
ربما فقدان الأشخاص والغاليين؟
هل فقدتي أحدهم بارادته؟ ترككي ورحل دون سبب أو عذر، فقط شعر برغبته في الرحيل أو بعجزه عن اكمال الرحلة معك؟
أم فقدتي أحدهم بسفر لا مفر منه؟ مؤقت ليبحث عن رزقه أو ربما هاجر بحثا عما يفقده في بلادنا الحزينة؟
لعلك فقدتي أحدهم بموت؟ رحل دون وداع، دون اكتفاء منه، دون أن تشاركيه أشياء كثيرة عندما حدثت بعد رحيله صارت محزنة رغم فرحها أو تضاعف ألمها ان كانت أحزانا؟
في كل مرة نفقد شيئا أو شخصا تنقص من روحنا قطعة، نبحث عنها كثيرا لنعيدها فنستعيد نفسنا كاملة كما كانت. قد نبحث عنها ونحن نمارس حياتنا بشكل طبيعي جدا ولا يشعر المحيطون بنا بم يعتمل بداخلنا، وقد نبحث عنها وقد أصاب حياتنا الشلل التام مهما كانت أهمية ما نقوم به من أنشطة وأدوار. كلا الخيارين خطأ لا يغتفر في حق أنفسنا.
الحل ليس البحث فتلك القطعة المفقودة من روحنا لن تعود أبدا، هل رأيتي من قبل جرح قطعي يشفى بنفس الجزء المفقود منه؟ أن خلاياه تجدد من نفسها ويشفى الجرح بنسيج جديد.
كذك الفقدان صغيرتي، ما نفقده لا يعود أبدا مهما كان، حتى وان عاد هو بذاته
فالقيم ان فقدت نصبح دائمي الشك في نوايا كل من نتعامل معهم، والصديق أو الحبيب ان خذلنا وعاد تظل في القلب غصة ، والثقة المفقودة لا تعود أبدا مهما حدث، والغائب بالسفر حين يعود نجده تغير نتيجة تجربته وما مر به، والوظيفة وان عدنا لها نكون أكثر خبرة وتعلمنا درسا أو دروس عديدة، والراحلون بالموت لا يعودون لكن تظل ذكراهم معنا تؤنسنا أو تؤرقنا.
يبقى فقداننا لأنفسنا وثقتنا فيها وطاقتنا لتكملة الرحلة ... هل نعود كما كنا؟ هل نرفع رأسنا مرة أخرى ونتحدث بثقة وصوت ذو طبقة عالية وألفاظ واضحة؟ هل نشحن طاقتنا وربما نكون مصدر طاقة للآخرين فنكمل الرحلة ونضم لنا رفقة طيبة في طريقنا؟ ان نجحنا في كل ذلك ستتجدد خلايا روحنا وتلتئم جراحها وحينها فقط يحدث الشفاء بشكل كامل لتلك الروح الممزقة.

يقول الله تعالى في سورة البقرة : ( وَلَنَبْلُوَنَّكُمْ بِشَيْءٍ مِنَ الْخَوْفِ وَالْجُوعِ وَنَقْصٍ مِنَ الْأَمْوَالِ وَالْأَنْفُسِ وَالثَّمَرَاتِ وَبَشِّرِ الصَّابِرِينَ * الَّذِينَ إِذَا أَصَابَتْهُمْ مُصِيبَةٌ قَالُوا إِنَّا لِلَّهِ وَإِنَّا إِلَيْهِ رَاجِعُونَ * أُولَئِكَ عَلَيْهِمْ صَلَوَاتٌ مِنْ رَبِّهِمْ وَرَحْمَةٌ وَأُولَئِكَ هُمُ الْمُهْتَدُونَ )

البوست ع الفيس 

https://www.facebook.com/om.abdelrahman.7355/posts/2339243786299870

شلة خيط 7

وعشان ما تتوهش مننا بداية الخيط افكركم بأهم تلات حاجات في حياتنا اللي شبهناها بشلة الخيط
أولا: مين اللي فك الورقة اللي كانت مسيطرة و مخليانا زي الكتاب ما بيقول
ثانيا: مين اللي شد الخيط و كعبله و تسبب في الكلكعة الخرافية اللي يا عالم هتتفك و لا لأ
ثالثا: الخطوات اللي حصلت بعد الكلكعة، عرفنا نرجع الأمور لقواعدها سالمة ولا نفسنا نرمي الخيط من بابه

وقلنا ان ممكن نبقى احنا اللي بنكلكع حياتنا مش شرط ناس تانية وكمان ازاي نتفادى الكلكعة من الاساس مع الوضع في الحسبان اختلاف نوع خيوطنا "محدش فينا شبه التاني"

طب كل اللي فات ده بيحل المشكلة؟ ولا هري بوستات؟🤔

لا كل اللي فات ده حاجتين أهم من الحل نفسه اننا نتفادى المشكلة واننا ندركها ... حصل كل ده ووصلنا له فده في حد ذاته انجاز فوق الفظيع بشويتين 🤗 يخلينا بمنتهى السلاسة ندور على حلول ونقبل طرح البدايل ونسعى فعليا للحل

لوحدنا؟ لا مش شرط...
فيه ناس ربنا رزقها العقل و الحكمة انها بعد مرحلة عمرية معينة تنضج لدرجة انها تعمل كل المراحل دي لوحدها مع الاستعانة بالله طبعا قبل أي شخص

لكن كتير مننا بيحتاج للمساعدة والاستعانة بصديق "بس مش زي جورج قرداحي في ستين ثانية بس😉" فك الكلكعة بيحتاج شهور وساعات سنين لأن فعليا الخيط اتكلكع واتلعبك ويمكن اتقطعت منه حتت ووصلناها في شهور وسنين طوييييييلة من مواقف وأحداث كتيييييييييييرة 😥
طيب أي صاحب يتصاحب كدة عادي؟ 🙄لأ لازم حد يبقى اكثر مننا حكمة وعقل وبصيرة بحيث انه يدرك مدى سوء المشكلة وقدرتنا اننا نمشي في طريق الحل ومجرد شعورنا بدعمه يخلينا نقدر نثبت ونصبر واحنا بندور على حل. 😎

يعني مش هو اللي هيحل؟ 🤔 يمكن يقدر ينور الطريق لو هو حد مطلع، مثقف، فاهم العلوم الانسانية وطبايع البشر، فاهم طبعنا وعارف صعوبات اللي بنمر بيه لكن انت اللي هتحل مش حد تاني

زي الأم اللي عارفة ابنها بيخاف من ايه 😣ومع ذلك بتساعده تدريجيا يتغلب على خوفه وتشجعه من غير ما تجبره او تزيد الخوف ده لأن ببساطة هي ما تقدرش تتصرف بداله.

طيب هو كلنا لنا أصحاب وأصدقاء بجد؟ ماهو بيقولوا مفيش صاحب بيتصاحب😔
في الحالة دي لا هو عيب ولا حرام نلجأ لشخص دي وظيفته "اختلفت المسميات حسب مكان الكلكعة استشاري علاقات أسرية، لايف كوتش، أخصائي نفسي، أخصائي تربوي" مع ملاحظة اني مجبتش سيرة طبيب نفسي
المهم يكون شخص أمين ، صاحب علم وخبرة يساعدني أدرك مشكلتي ويساعدني أحلها بنفسي ويوفر لي الأدوات.

ايه ده يعني مش هيحلها لي ويفك الكلكعة ويكمل البلوفر؟ 😨لا خالص اطلاقا... هو بس بينور حتت ضلمة، بيوريك الطريق منين وانت اللي لازم تمشيه. عشان الحياة حياتك والهدف هدفك ومحدش بيعيش حياة حد ولا بيحقق هدف حد.

لو وصلنا لهنا المفروض تبقى كل خيوطنا مالكينها في ايدينا، عارفين اولها من آخرها، عارفين نبدع بيها ونبتكر قطعة فنية اسمها حياتنا، اللي هي فعليا بتختلف من شخص لشخص وبتميزه عن غيره وحتى لو الخيط اتلعبك هنقف لحظة ونفكه او حتى نرجع ورا كام سطر ونفك العقدة ونكمل البلوفر على خير عشان كل بلوفر كان أصله ببساطة شلة خيط ❤️❤️

 

البوست ع الفيس

https://www.facebook.com/om.abdelrahman.7355/posts/2337252059832376

شلة خيط 5ـ 6

اتفقنا ان الوقاية خير من العلاج والتمهيد للتجارب اللي بنعدي بيها لأول مرة بيخليها غالبا تمر بسلام بدون كلاكيع وعقد نفسية وجروح نداويها في سنوات طوال وغالبا ما تترك ندوبا حتى بعد العلاج.
طب فيه حاجة تانية مهمة غير موضوع التمهيد؟🤔🤔
ايوة فيه حاجتين لازم نراعيهم واحنا بنتعامل مع نفسنا ومع الآخرين
أولا: بلاش احنا اللي نكلكع خيوط حياتنا
ثانيا: الخيوط انواع كتييييييييييييير، بمعنى مفيش شخص زي التاني
طب يا حاجة انتي بتتكلمي عن ان الخيط لما بيتفك فيه بيكلكعوه وفيه بينسجوه بمنتهى الحرفية والاتقان!!؟؟🙄
ده حقيقي بس كمان لازم ندرك كويس اننا جزء في تكوين نفسنا، مش مجرد ردود افعال لأحداث ومواقف وأشخاص.
رب العزة بيقول في كتابه الكريم ... بسم الله الرحمن الرحيم " إن الله لا يغير ما بقوم حتى يغيروا ما بأنفسهم" .
يعني كل حد فينا لازم يطور ويحسن من نفسه ويشوف مشاكله اللي أثرت فيه وعليه ويعالج آثارها السلبية لو وصلت لمرحلة انها مكلكعة حياتة ومخلياه مش قادر يتقدم للأمام😥
مش قادر يتفوق في دراسته
مش عارف يختار مجاله اويطوره
مش قادر ينجح مع شريك او شريكة حياته
مش قادر يحط أهداف ويحققها ... متردد او خايف
يعني الليلة سهلة كدة؟😏 لأ طبعا مش سهلة كدة ... أصعب حاجتين فيها الادراك أولا ثم اتخاذ قرار التغيير
فيه ناس مش مدركة ان عندها مشكلة مع ان الكل شايفين وبيصارحوهم بالمشكلة دي لكن برضه بيكابروا او بيعندوا او ممكن يكون فعلا عقلهم عاجز عن ادراك المشكلة دي.
زي واحد عصبي😠 وكل اللي حواليه شايفينه صوته عالي وسهل الاثارة وهو شايف انه عادي.
انا مش عصبي ولو ضيقت عليه في الكلام يقوللك خلاص يا سيدي انا كدة خلقة ربنا ان كان عاجبك. طب يا باشا طالما اقريت انك كدة ما تتغير ،خد قرارك انك تصلح مشكلة عندك ... لا هو انا كدة غلاسة 😝 "عادل امام ستايل" وان كان عاجبكم ومش هاتغير.
طبعا العصبية مجرد مثل لا أكثر لو شلناها ممكن نحط صفات كتييييييييييييير سلبية مكلكعة حياتنا وبنرفض نشوف ان المشكلة عندنا وحلها برضه عندنا.

ثاني حاجة سهل ندركها من سؤال واحد.
هو البلوفر الحرير زي القطن زي الصوف؟ مناسبين لأي طقس وأي مناسبة؟ بننسجهم بنفس الابر؟ بياخدوا نفس التركيز والدقة؟ بعد ما يخلصوا بنغسلهم ونجففهم بنفس الطريقة؟ أيا كان لون وخامة البلوفر هيليق على اي حاجة وكل حاجة؟
الاجابة على كل الأسئلة دي واحدة هي ... لأ 🤐
طيب احنا كمان كدة ...
مننا الحساس ... ومننا اللي بيستحمل ويسد في أي موقف ... ومننا اللي دايما بنلاقيه وقت الحوجة ... ومننا اللي منظره حلو بس عشرته مش مريحة ... ومننا اللي اللي ما نستغناش عنه ومع ذلك مش بنحسن معاملته ورغم كدة سداد وعمره ما خذلنا.
ومننا ... ومننا... ومننا...
اشكال والوان و طبايع وبيئات وديانات وكلاكيع سابقة وكلاكيع قيد التنفيذ وكله ملخصه اننا مش شبه بعض 🙃
ما ينفعش تعاملني زي ما بتعامل غيري
ما ينفعش تطلب مني اعاملك زي مانت بتعاملني عشان طاقتنا وقدراتنا و أساليبنا مختلفة
ما ينفعش تتوقع مني اكون شخص خارق ... بتاع كله احتواء وعاطفة وحكمة وعقل ومنطق وتفاؤل وايجابية ومرح ورزانة ولما ماعملش حاجة منهم ابقى مقصر او مش عند حسن ظنك وخيبت أملك 🤨
طب يافندم مين المسئول عن التوقعات؟ انت مش انا
مين اللي بيكلكع الخيط؟ انت مش انا وعلى فكرة بتكلكع خيوطك وخيوطي
مين اللي مش مدرك الاختلافات مهما كانت واضحة وضوح الشمس؟ انت مش انا
مين اللي بيعكس الادوار وعايش دور الضحية والحقيقة ان عملته ما يعلم بيها الا ربنا؟ انت مش انا
مين اللي هيحاسب على المشاريب؟ انت مش انا 😎
عشان انا مدرك اختلافنا واختلافاتنا وعارف حدودي وباحط لك حدودك وانت في اللالا لاند 😇
المرة الجاية هاحاول اخلص البلوفر

البوست ع الفيس

https://www.facebook.com/om.abdelrahman.7355/posts/2335945493296366

شلة خيط 4

اتفقنا ان فك الخيط مش هو اللي بيكلكعه وانه مش نهاية الدنيا لكن بدايتها، وماختلفناش ان مش كل اللي بيمسك الخيط بيلعبكه ويخلينا مش عارفين اوله من آخره، بالعكس ممكن يصلح اللي باظ منه او يحسن استعماله في ابدع عمل فني.
بس فيه حاجات ممكن توفر الكلكعة من الأساس و تخللي كل كام سنتيمتر يتفك زيادة في سطور لحياة مليانة جمال وابداع ... منها التمهيد . أيوننن
مفيش اجمل ولا أروع من ان الواحد وهو داخل على تجربة جديدة، مرحلة جديدة، دور جديد في حياته يسبقه حد عدى بنفس الظروف ويشرح له الموضوع بدون تهويل ولا تهوين.
يعني ايه ان شاء الله هندي وداننا لكل حد، وكل واحد يفتي و يهري وأصلا مش كلنا شبه بعض ولا كلنا ظروفنا زي بعض واللي بينفع مع حد ما بينفعش مع حد تاني !!!!!!!!!!!!!!؟؟؟؟؟؟؟؟؟؟؟؟؟
بس بس بس ، هي مش خناقة يا عم الحاج 😊 بمنتهى البساطة التمهيد يعني اشرح التجربة او المرحلة او الدور نفسه من غير ما احط التاتش بتاعي. نقول مثل عشان محدش يخنقني او يتخنق مني
من اول الطفل الصغير اللي بندي له حقنة ولازم ندي له حقنة عشان حالته محتاجاها، اعرفه انها علاج و هتوجع شوية بس ثانية واحدة لو فكرنا او اتشغلنا بحاجة تانية مش هنحس بيها ، بس هي مهمة وضرورية
لكن ما شاء الله نلاقي الأهالي كتر خيرهم عاملين الحقنة كارت ارهاب،🙄 لو مكلتش هتاخد حقنة ، لو مسمعتش الكلام هاوديك للدكتور تاخد حقنة، حتى اللي عايزة تروح مشوار و تزوغ من عيالها "ماما رايحة للدكتور تاخد حقنة ولو رحت معاها هتاخد انت كمان" وكأنه عرض حقنة عليها حقنة هدية فلما يحتاج فعليا ياخد حقنة تلاقي انهيااااااااااااااار و هستريا عياط كأنك هتدبحه او هتغزه بمطوة و الحقنة اصلا لسة مالمستهوش و ده التهويل
أو العكس الحقنة دي ما بتوجعش ، دي سهلة خالص ولما تقع الفاس في الراس و ياخد حقنة دواها تقيل او يا حرام تيجي في قرعته ممرضة مفترية نفقد مصداقيتنا عنده وما يصدقناش في اي حاجة بعدها خالص وده طبعا تهوين.
نقيس على كدة كل تجاربنا و مراحلنا و ادوارنا
البلوغ
الحب الأول
الثانوية العامة
الكلية
وظيفة جديدة
سفر لبلد اجنبي سواء فسحة او شغل
زواج وكل تفاصيله
حمل وولادة
عزال ونقل شقة جديدة
بداية مشروع خاص
تغيير للكاريير او قرار بدراسة جديدة
كل حاجة من دي عايزة لها مجلد في فتي وهري الآخرين مش هننكر لكن برضه كل حد فينا عدى بالتجارب دي بدون تمهيد مش هيقدر ينكر لو صريح مع نفسه كمية الكلكعة والكعبلة اللي حصلت جواه بسبب المفاجآت والمشاعر غير المتوقعة اللي عدى بيها  

😉

البوست ع الفيس 

https://www.facebook.com/om.abdelrahman.7355/posts/2332200353670880